Žywe kulturne derbstwo něnt lěpjej widobne – camprowanje a zapust stej se na informaciskem portalu SORABICON wózjawiłej

Na sorabistiskem informaciskem portalu SORABICON jo digitalna dokumentacija imaterielnego kulturnego derbstwa se dalej rozšyriła. Gano stej se w zběrce „Žywe kulturne derbstwo w Dolnej Łužycy“ wózjawiłej dwa nałoga zapustojskego casa: camprowanje a zapust.

Gromaźe z tyma nowyma nałogoma informěrujo ta digitalna zběrka Serbskego instituta něnt wót 13 kulturelnych praktikow we 118 jsach a městach Dolneje Łužyce – z pomocu 905 dokładow (zwětšego fotografijow, casnikowych artikelow a wideow). Camprowanje a zapust pregujotej južo wót generacijow zgromadne žywjenje we serbskich jsach a słušatej k tym šyroko znatym praktikam zapustojskego casa. Ta online-dokumentacija wucynijo jeju regionalne formy a wjelerakosć lokalnych tradicijow widobne.

Camprowanje markěrujo we wjele jsach zachopjeńk zapustojskego casa. Hupa pśegótowanych luźi śěga z muziku wót dwóra k dwóru, wóni rejuju z góspozu abo góspodarjom a zběraju jaja a druge dary za wjacor, gaž te jaja worduju gromaźe pśejěźone. Za pśewjeźenje togo nałoga jo až do źinsajšnego ten kolektiw wejsanarjow zagronity.

Wjerašk zapustojskego casa jo pótom zapust sam. Pyšnje woblacone póriki śěgaju z gercymi pó jsy, woglěduju k luźam, rejuju a źarže z tym tradiciju pśi žywjenju, kótaraž jo widobne znamje zgromadnego žywjenja, mjazsobneje zwězanosći a kulturelneje identity. We wjelich jsach jo zapust jaden tych nejwažnjejšych tšojenjow cełego lěta.

Ten modul „Žywe kulturne derbstwo w Dolnej Łužycy“ na SORABICONJE jo dynamiska zběrka imaterielnego kulturnego derbstwa. We jogo ramiku worduju kulturne praktiki wědomnostnje dokumentěrowane a k ilustraciji z fotografijami, casnikowymi wopowěsćami, filmami a drugimi žrědłami zwězane. Te wopśimjeśa stoje k dispoziciji we někotarych rěcach a su myslone za wšykne interesenty kaž teke za slěźarje. Te same namakaju we tej zběrce informacije nic jano k serbskim nałogam a swěźenjam, ale teke k tradicionelnym rucnikaŕskim technikam, k wustnje dalej dawanym tradicijam, pśedstajajucemu wuměłstwu a znaśam wót natury. Pósporomje tematiskego pśistupa dajo interaktiwnu kórtu, ako bitujo dobry pśeglěd, źo se te praktiki namakaju.

Ten projekt „Praktiki imaterielnego kulturnego derbstwa w Dolnej Łužycy“ jo źěl wětšego pśedewześa „Digitalny portal k serbskim a łužyskim rěcnym a kulturnym krajinam“. To same se spěchujo wót Załožby za serbski lud ze srědnosćami Zwězkowego ministaŕstwa za nutśikowne nastupnosći na zakłaźe wobzamknjenja Zwězkowego parlamenta.