Inwentar dolnoserbskego pismojstwa online
Nowe póbitowanje na sorabistiskem portalu Serbskego instituta SORABICON
Gano jo Serbski institut wózjawił w sorabistiskem portalu SORABICON nejnowšu zběrku: inwentar śišćanego dolnoserbskego pismojstwa wót zachopjeńkow až do lěta 2024. Pódawaju se bibliografiske daty (titel, awtor, pśestajaŕ, licba bokow, nakładnistwo, nakładnik, wudawaŕ, městno, lěto wudaśa). Za wjeliki źěł wobspomnjonych wósobow (awtorow, pśestajarjow, nakładnikow, wugótowarjow atd.) su se dodali pokazki na tak pomjenjonu Zgromadnu normowu dataju (wujasnjenje dołojce). Teke linki do Serbskeje bibliografije, z kótarejež póchada wjeliki źěł w inwentarje zestajonych datow, se systematiski pódawaju. Za historiske pismojstwo do 1945 namakaju se wušej togo pokazki do Dolnoserbskeje digitalneje biblioteki a na scany originalnych śišćow we wšakich bibliotekach, ako mógu se direktnje na wobrazowce cytaś.
“Za dolnoserbšćinu źěłamy juž wjele lět na wósebnosći, ako dajo se zewšym jano za ‚mału rěc‘ realizěrowaś: na dopołnem tekstowem korpusu pisneje rěcy, ako se wótbłyšćujo w śišćach wót zachopjeńka 18. stolěśa. Wjeliki źěł jo se južo wózjawił, zbytk slědujo až do lěta 2029. Něnto wót dr. Fabiana Kaulfürsta zestajony a pśez wobšyrne rešerše rozbogaśony a pólěpšony ‚inwentar‘ twóri zakład togo ‚połnego korpusa‘. Zrazom bitujo nowy zapis direktny pśistup k pśistupnym cytańskim tekstam a scanam“, tak wjednik projekta prof. dr. Hauke Bartels.
Co jo SORABICON?
Wěcejrěcny sorabistiski portal SORABICON Serbskego instituta jo modularnje natwarjona digitalna pśirucnica za wšych, ako se zajmuju za serbsku kulturu, za rěc a stawizny. We nim dajo informatiwne artikle, wjele fotow, ale teke wideja a o-zuki casowych znankow a dalšny naglědniwy material. Aktualnje jo dwanasćo zběrkow pśistupnych, ako tematizěruju mjaz drugim žywe kulturne derbstwo Dolneje Łužyce, serbske slědy we Warnoćicach (Varnsdorf, ČR), slěpjańsku rěcnu krajinu abo standardne źěło, digitalny Serbski kulturny leksikon. Pó pótrjebnosći nastawaju nowe zběrki z wuslědkami sorabistiskego slěźenja pśi Serbskem instituśe.
Pokazka: Za rěc zajmowane luźe namakaju dodatnje na rěcnyma portaloma Serbskego instituta dolnoserbski.de a hornjoserbsce.de wobšyrne serwise, na pś. słowniki, digitalnu biblioteku, rěcne wobroty abo awdija.
Zgromadna normowa dataja (GND) – jadnore wujasnjenje
Zgromadna normowa dataja (Gemeinsame Normdatei, GND), kótaruž wjeźo Nimska narodna biblioteka, jo něco ako wjelicki, derje wótwardowany adresnik. Z jeje pomocu mógu se wósoby, městna abo wuźěła jasnje a njecwibelnje identificěrowaś, njewótwisnje wót togo, na kaki part su něźi zapisane abo pómjenjone. Pśikład: Ta sama wósoba móžo se jawiś z połnym mjenim, w pśikrotconej formje, ale teke w ceło drugej rěcy. Normowa dataja GND zwězujo take a wšake warianty pód jasnym zapisom. Jadna se wó nejwětšu zběrku normowych datow na pólu kultury a slěźenja nimskorěcnego ruma.